◄ الكــــوفـے الجزآئري ✖ 100 % DZ ► | العـ 148 ــدد | الشعب يريد " زر الخلفية " ! _-_

إيمان ، خمس دروس ف الحصة خخخخ اصلاً العام لي فات ف الرياضيات و كنا نديروها تقول يجريوا وراها 
غير نكملوا الدرس تشوف ف الساعة و تقول ايييه رانا روطار ف البرنامج 
و تدخل طول ف الدرس الجديد وخنا يدينا سي بون ما نقدروش نحركوهم من التعب 
( نكتبوا ياسر -_- ) وو للمعلومة حنا سابقين الأقسام كل خخخخ 

ليسونسيال قالوا كاين تعويض في عطلة الربيع ، واذا رحنا نروحوا فيزيا ومات الباقي ربي يسهل ما يهمونيش

مريوومة ، الله يبارك  

بصح ما شتيش وش داروا فيهم تاع المدارس العليا ؟ يضربوهم وكلش معاملة سيئة جدًا الحيوان وما يقبلهاش 

على كلٍّ ، أنا مانيش شايفة أوضاع البلاد بهديك لملاحة ~

الطياب هههههه يخي انا ندير غير الكسرة مراات برك وين نطيب حاجة تحت إشراف ماما 

ع بالكم كانت عندي صحبتي تقولي انا ما نتعلمش الطياب غير لي يحوسوا يتزوجوا لي يتعلموه ._. 

قلتلها وكون تروح ماماك لكاش بلاصة خاوتك وباباك شكون يلتا بيهم قاتلي نقلي بطاطا برك 
ونشروا الخبز ولا كاشما نجيبوا حاجة من برا ( للعلم هي أكبر زواخة ف التاريخ ) 

قوليلي شكون لي يعيش غير ع البطاطا و الخبز والفاست فوود -___- 

ماذا تفعلووون ؟

يبارك فيك ختيتو ايه واش تقراي أمولة 
واه شفت في التلفاز شتا دارت فيهم  احنا نكثرو الدعاء و تقولو
الله يجيب الخير هذا مكان
هههه احنا في الغرب عندنا المرأة للي دير الخبز
هي الشاطرة 
و الطياب مش شرط غير للزواج الواحد يتعلم لروحو
و لعائلتو و كيما قلتي ماتنجميش تعيشي غير بالفريت

أنا سنة 2 ثانوي - شعبة رياضيات 

ان شاء الله ربي يكون بعون كل مظلوم ~

ههههه مختلفة بصح الكسرة تاعنا وتاعكم نوغمالمو 
هادي تاعنا ( سطيف ) : 

 

هادي تاع عنابة :

 

تجي طرية شوي على تاعنا 

تاع الغرب ما علاباليش كيفاه  

نظن نتي قصدك المطلوع ولا خبز الدار ولا حاجة كيما هاك .. 

انا ما نكذبش يعني ما نلوحش روحي بزاف للطياب غي ساعات برك 
مي كومام هههههه

اه الله يبارك ربي يوفقك أن شاء الله 
احنا قاع المرأة الي تعجن نعتبرها شاطرة
اذا كان خبز الدار أو الطلوع
هاو ليط المطلوع تاعنا

 المهم في الطياب تسلكي راسك شوي
حتى بطبخة و لا زوج

ايوه مام هذا يديروه هنا و يحبوه ، باستثنائي ههههه 
نحب غير الكسرة تاعنا ما ناكلش الحوايج الطريين كيما المطلوع والكسرة لي يديروها خوالي ساعات في عنابة 

خلينا نكملوا العدد هذا هههه راه طول فوق اللازم xD

علاش كسرتكم ماجيش طرية جامي 
لاذقتها ، شتاهم الاطباق اللي شايعيين عندكم
هههههه اوكي نكملوه رانا غير قاعدين

علابالك كون ما عنديش عمتي عايشة في تيارات ، كون ما فهمتش وش معناها كلمة " شتاهم " = ماهي ؟ يخي ؟ هههههه 

ميش فرق كبير في الأكلات تاوعنا ، غييير شوية برك مثلاً كيما الكسرة و الحريرة ولا منعرف وش ( أحيانًا اختلاف أسماء برك )

تديروا حتى نتوم الكسكس يخي ماكاش لي ما يعرفوش في الجزائر ههههه

* أنا قبايلية بالمناسبة *-*

امال خيار الناس حبيبتي
هههههه اذا مفهمتيش كلمة قوليلي راني هنا و نفهمك عادي
ايه احنا عندنا الكسكس و المردود يديروهم بزاف
بلاضافة الى الفطير و الروينة و الكعبوش و المبسس و المقنتة و البغرير و المدلوك
اذا معرفتيهمش قوليلي نرسلك الصور

امونة اذا حبيتي نعجنلك شوي مطلوع و نرسلك
اذا زورتينا شي نهار نديرلك قاع واش تحبي